Nakumpirma ti umuna a kaso ti Ebola virus disease iti kabeserana ti Nigeria nga Abuja kalpasan a nagpositibo ti maysa a babai nga addaan iti nabiit pay a travel history idiay Uganda babaen ti laboratory test.
Segun kenni Nigerian Health Minister Muhammad Ali Pate, naisina ti pasyente ken umaw-awat iti kasapulan a pannakaagas bayat nga agaramid dagiti otoridad kadagiti addang tapno malapdan ti panagwaras ti virus.
Iti report ti World Health Organization (WHO) idi Oktubre 20, nangrugin a makapadas ti pasiente kadagiti sintoma idi Oktubre 7, uppat nga aldaw kalpasan a simmangpet idiay Nigeria.
Nagpakonsulta daitoy iti pribado a pasilidad ti salun-at idiay Abuja idi Oktubre 11, sakbay a nakumpirmaan ti impeksion iti laboratory test idi Oktubre 20.
Naammuan dagiti otoridad ti 44 a posible a kontak ti pasiente ken agtultuloy a bantayan ida babaen ti contact tracing.
Dagiti mamonitor ket pakairamanan dagiti healthcare workers, dadduma pay a pasiente, caregivers ken tattao a mabalin a nakalangenna bayat ti panagbiahena.
Agtultuloy met ti imbestigasion tapno maammuan ti nagtaudan ti impeksion ken makompleto ti travel and exposure history ti pasyente. Ti Ebola ket nakaro ken mabalin a makapatay a sakit a patauden ti Ebola virus.
Karaman kadagiti sintoma daytoy ti gurigor, nakaro a panagkapuy, sakit ti ulo ken panagsakit ti bagi, panagisbo ken panagtakki. Iti dadduma a kaso, mabalin nga adda met panagpadara.
Mayakar ti virus babaen ti direkta a pannakasagid iti dara wenno dadduma pay a pluido ti bagi ti naimpektaran a tao, kasta met dagiti kontaminado a banag. Mabalin met a mayakar babaen ti panangsagid iti bagi ti tao a natay gapu iti Ebola.
