Inruaren ti Provincial Government of La Union dagiti aktibidad para iti maika-21 nga edisyon ti La Union Surfing Break 2026.
Ita a tawen maisayangkat iti naduma-duma nga aktibidad kadagiti tallo nga ili pakairamanan idiay San Juan, Bacnotan ken idiay ili ti Agoo.
Idiay ili ti Agoo, maisayangkat ti Agoo leg inton Oktubre 26 agingga 27, a pakaibilangan ti La Union Surfing Break Banchetto, Beach Volleyball Free Banca Ride, San Castle Making Competition, Most Decorated Banca Competition, Live Band Performances ken Beach Party.
Iti Bacnotan Leg ket maisayangkat met inton Oktubre 29 agingga 31, dagiti sumaganad nga aktibidad ket iti Coastal Clean Up, Zumbacnotan, Beach Volleyball, Free Surf Clinic, Surfing Competition, Rescuelympics, ken music and foam party.
Bayat nga idiay San Juan ket maisayangkat dagiti aktibidad iti uneg ti lima nga aldaw.
Inton Oktubre 30 – La Union Local Surfing Compitition, San Juan Surf Clinis, Art Installation Competition, Zumba Alon at Indak, ken Glow Run
Inton Oktubre 31 ket iti Pa-wecan race, beach volleyball, elyu music awards, local beach market ken music festival.
Inton Nobiembre uno maisayangkat ti La Union Surfing Break final concert ket maimatangan ti live performance ti maysa a nalatak nga banda.
Itay kallabes nga aldaw, inbinsa-binsa ni Provincial administrator Dr. Ramon Torres iti naangay a press conference, dagiti inaramid a panagsagana iti gobierno probinsiyal ken no apay a tallo nga ili ti pakaisayangkatan ti nalatak nga aktibidad ita a tawen.
Inbinglay met ni Riza Joy Abat, Tourism Officer Designate ti LGU San Juan iti naan-anay nga panagsaganada ti a San Juan, a kangrunaan a pagdudupodan dagiti turista.
Kabayatanna inpasigurado met ni PMAJ Reynante Organista, Chief of Police ti San Juan Police Station nga adda iti naan-anay a pwersada tapno bantayan ti seguridad iti pakabuklan nga aktibidad.
