Naipasidong iti State of Calamity iti ili ti Guinayangan idiay probinsiya ti Quezon gapu iti agtultuloy nga epekto ti El Niño ken iti mapas-pasaran sadiay a nakaru a kinakirang ti danum.
Gapu iti nasao a deklarasyon, awtomatiko a naipatungpal iti price freeze iti kangrunaan a produkto a petrolyo tapno matulungan ken maprotektaran dagiti residente kontra iti kellaat a panag-ngina dagiti gagatangen.
Sakopen ti nasao a price freeze dagiti household Liquefied Petroleum Gas wenno LPG kadagiti silindro a sangapulo ket maysa a kilo (11 kg) agpababa agraman dagiti produkto a kerosene.
Agtalinaed nga epektibo ken adda bileg ti price freeze iti uneg ti 15 nga aldaw sipud pormal a naideklara ti state of calamity iti nasao nga ili.
Agtultuloy a ban-bantayan iti maseknan nga ahensya dagiti lokal nga establisimyento tapno masiguro a tung-tungpalen da iti intuding nga allagaden iti panag-presyo.
