Ipatungpal manen ti Senate Impeachment Court iti Rule 18 wenno sub judice rule iti amin nga articles of impeachment kontra kenni Vice President Sara Duterte, karaman dagiti immuna nga artikulo nga inyatras ti prosekusyon.
Iti baro a ruling ita nga aldaw ni Presiding Officer Francis “Chiz” Escudero, imbilin manen ti impeachment court iti amin a partido nga agkedked a mangiruar wenno mangibaga iti publiko kadagiti banag a mainaig iti merito ti amin nga artikulo, pending man wenno naikkat.
Daytoy ket kalpasan ti manifestation nga impila ti depensa idi Nobiembre 4, no sadino nga impapilit ti kampo ni Duterte a saanda a sumuko iti Rule 18, ken nasken a mataginayon daytoy tapno masalakniban ti integridad ti trial ken ti konstitusional a karbengan ti bise presidente.
Iti sidong ti Rule 18, amin a dasig dagiti senador-judges, prosecution, defence team, ken uray dagiti abogadoda ket masapul a saan nga agaramid iti publiko a komento wenno mangiruar iti impormasion maipapan iti merito ti pending impeachment trial.
Gapu iti daytoy, impakdaar ti korte a ti siasinoman a manglabsing iti bilin ket madusa sigun kadagiti pagannurotan a nailanad iti napalabas a panagngeddeng.
Maipalagip nga idi Oktubre 13, inikkaten ti House prosecution panel ti tallo kadagiti uppat nga articles of impeachment kontra kenni Duterte, pakairamanan ti Article I wenno maipagarup a di umiso a pannakausar ti confidential funds, article III mainaig iti bribery ken article 4 wenno mainaig iti grave threats.
Iti agdama, ti laeng artikulo 2 wenno ti maipagarup a saan a mailawlawag a kinabaknang ti bise presidente ti nakasagana iti korte, a sungbatan ti depensa iti panangidatagda iti ebidensia inton Nobiembre 9.
