Itantandudo ti Supot Makers Association manipud iti Barangay Baraoas Norte, Naguilian, La Union iti panagusar dagiti recycled paper bags kas alternatibo kadagiti single-use plastic, maiyannurot iti panangipatungpal ti Plastic Code of La Union.
Paset ti panagaramid ti paper bags iti programa nga One Barangay, One Product (OBOP) ti lokal a gobierno ti Naguilian a tarigagay a suportaran dagiti lokal a produkto ken pagbiagan dagiti barangay.
Segun iti nairuar nga impormasyon, mangisusuplay iti asosasyon dagiti de-kalidad a recycled paper bags kadagiti nadumaduma a merkado, saan laeng nga idiay Naguilian nu di ket pati kadagiti kabangibang nga ili.
Mabalin met a mangusar dagiti paper bag kas pagkabilan dagiti nagatang ken panagbalkot dagiti regalo.
Tarigagay ti inisyatiba a maallukoy iti publiko a mangusar dagiti eco-friendly alternatives ken makissayan iti panagdepender kadagiti single-use plastics ditoy probinsia ti La Union.
