Mangnamnama ti kampo ti prosecution nga awanen dagiti isyu wenno mosion a pakaigapuan ti sabali pay a pannakaitantan ti pannakaituloy ti impeachment trial kontra kenni Bise Presidente Sara Duterte iti daytoy umay a Lunes, Nob. 9.
Kayat ti prosekusyon a dumiretso iti panagdengeg iti nabatbati nga Article II wennu ti alegasyon ti unexplained wealth iti laksid ti panangdakamat kadagiti impeachment article a saanen a naituloy.
Segun kenni House Prosecutor Atty. Jay Tolosa Jr., mangnamnamada nga awanen ti maipila a pre-referral matters wenno dagiti banag a kasapulan a masolbar nga umuna sakbay nga agtuloy ti aktual a panagdengeg.
Partikular a tinukoy ni Tolosa ti immun-una a panangipapilit ti kampo ti depensa a rumbeng latta a mapalubosanda a mangidatag kadagiti ebidensia a mainaig kadagiti artikulo ti impeachment nga inibbbatan ti prosekusion.
Impaganetget ni Tolosa a nalawag ti desision ti Senate Impeachment Court a saanen a mapalubosan ti nasao nga addang gapu ta awan ti maitulongna iti trial ken mabalin laeng a pakaigapuan ti pannakataktak.
Mangnamnama pay ti prosekusion a malpasda a pagsasaritaan ti nabati nga artikulo sakbay a malpas ti tawen.
Kabayatanna, kinuwestiyon met ni House Prosecutor ken Bicol Saro Party-list Representative Terry Ridon no adda umdas a testigo ti depensa a makasungbat iti tunggal alegasion ken dagiti ebidensia nga indatag ti prosecution.
Segun kenni Ridon, napateg ti panangidatag ti depensa kadagiti testigo nga addaan kabaelan a makailawlawag kadagiti alegasion, nangruna ta inawaten ti impeachment court ti dakkel a paset dagiti dokumento ken testimonia ti prosekusion.
Impaganetgetna a masapul a sanguean ti depensa dagitoy nga ebidensia iti presentasionda.
Malagip nga idi Oktubre, inkeddeng ti kampo ti prosecution a saanen nga ituloy ti tallo kadagiti uppat nga artikulo ti impeachment kontra kenni Duterte. Gapu iti daytoy, ti Artikulo II a mangdakdakamat iti maipagarup a saan a nailawlawag a kinabaknang ti kakaisuna nga isyu iti trial.
