Kiniddaw dagiti 20 a senador kenni Presidente Ferdinand Marcos Jr. nga ideklara dagiti lugar nga apektado wenno peligro iti epekto ti Super El Niño nga adda iti sidong ti kalamidad, tapno naparpartak iti panagresponde ti gobyerno gaputi manamnama nga epekto ti nakaru a tikag.
Nakapauneg iti panawagan iti Proposed Senate Resolution No. 765, a mangal-allokoy iti Presidente nga agtignay kasaruno ti ballaag ti Philippine Atmospheric, Geophysical and Astronomical Services Administration (PAGASA) seknan iti agraraira nga strong El Niño iti Tropical Pacific.
Kabilang dagiti nagpirma iti resolusyon da Senate President Win Gatchalian, Senate President Pro Tempore Vicente “Tito” Sotto III, ken dagiti senador nga isuda Kiko Pangilinan, Imee Marcos, Robin Padilla, Migz Zubiri, Bam Aquino, Risa Hontiveros, JV Ejercito, Lito Lapid, Joel Villanueva, Erwin Tulfo, Raffy Tulfo, Ping Lacson, Chiz Escudero, Alan Peter Cayetano, Pia Cayetano, Bong Go, Camille Villar ken Mark Villar.
Impaganetget dagiti mammanday linteg a kasapolan ti panagsagana ti gobyerno sakbay a kumaru iti epekto ti nasao a weather phenomenon, partikular kadagiti komunidad a possible a makapadas ti panagkurang ti suplay ti danum ken perdisyon iti agrikultura.
Maibasar iti kauddian a report ti PAGASA idi Nobyembre 4, agraraira iti Very Strong El Niño iti Tropical Pacific ket namnamaen nga agtultuloy agingga iti umuna a paset ti 2027. Posible pay nga umabot daytoy iti kangatuan a tukad sakbay a aggibus iti 2026.
Nagballaag ti weather bureau a ngumato iti posibilidad a panagkurang ti tudo, a mabalin a mangigubway ti dry spell ken panagtikag iti sumagmamano a paset ti pagilian.
Namnamaen pay iti mas nababbaba iti normal a panagtudo iti dakkel a paset ti Pilipinas ita a bulan ti Nobyembre.
