Indarum ti US Department of Justice (DOJ) ti tallo nga Iran-backed operatives a maipagarup a kaaraman iti agsasaruno a plano a panangraut dagiti terorista iti Estados Unidos ken Europa, agraman ti naiplano a panangraut iti air force base idiay United Kingdom.
Pormal a naipila ti kaso a maibusor kada Mohsen Mohajeri, Mohammad Ali al-Hassani, ken Mohammad Baqer Saad Dawood al-Saadi a naakusaran a nagplano kadagiti panagpabettak, pammagsol, ken panagespia iti sidong ti disguise a grupo nga Harakat Ashab al-Yamin al-Islamiya.
Maibasar iti imbestigasion, inorganisar ken nagbayad ti grupo kadagiti van a naglaon kadagiti bariles ti gasolina ken kemikal tapnu puntiriaen iti base ti RAF Fairford idi Setiembre 2026, nu sadino a nakaipuesto dagiti tropa ti US.
Maysa kadagiti suspek ti nangisayangkat iti komunikasion babaen kadagiti encoded messages manipud iti uneg ti pagbaludan ti New York bayat nga ag-operate ti dua pay manipud Iran.
Nainget met nga inlibak ken kinondenar ti embahada ti Iran dagiti alegasion, nga inawaganda nga awan nakaibasaranna iti laksid ti pannakaaresto ti pito nga indibidual idiay UK.
Impaganetget ti FBI Director Kash Patel a ti akusasion ket mangipakpakita iti agtultuloy a pangta ken determinasion ti Iran ken dagiti kaalyadona nga Islamic Revolutionary Guard Corps ken Kataib Hezbollah a mangisayangkat iti kinaranggas idiay Europa ken America.
