Pinainget ti Philippine National Police (PNP) ti panagpatrolia iti uneg ken aglawlaw kadagiti kangrunan nga shopping mall tapno mataginayon ti urnos ken seguridad ita nga umadanin ti holiday season.
Segun kenni PNP Chief Police General Jose Melencio Nartatez Jr., inorganisar manen dagiti nadumaduma a police units ti bukodda a deployment plans tapno epektibo a mabantayan ti manamnama a panagdupudup dagiti tattao kadagiti establisimiento.
Impaganetget ni Nartatez a kayatda a siguraduen ti natalna a selebrasion dagiti umili babaen ti pinainget a police visibility ken foot patrols tapno masolbar wenno malapdan ti aniaman a posible nga insidente ti krimen.
Iti sidong ti nadakamat a sistema, aglukat dagiti mall manipud 11 a.m. ti agsapa agingga 11 p.m. iti rabii tunggal lawas, bayat a naiparit met ti mall-wide sales kadagitoy nga aldaw tapno maksayan ti posible nga epekto ti nakaro a trapiko.
