Impaganetget ni House Private Prosecutor Atty. Jay Tolosa Jr. ti kinapateg ti kredibilidad dagiti testigo iti impeachment trial ni Bise Presidente Sara Duterte, a makuna a maysa kadagiti banag a rumbeng nga ikonsiderar dagiti senador iti panagdesisionda.
Segun kenni Tolosa, napateg a kitaen dagiti senator-judges no napudno ken mapagtalkan ti maysa a testigo kadagiti statement ken panangsungbatna kadagiti saludsod bayat ti panagusig.
Inlawlawagna pay a mabalin a makaapektar ti kredibilidad ti maysa a testigo ti pabaliw-baliw a testimonia, panangbaliktad kadagiti immunan a naisasao ken manmano laeng a pananglagip iti sumagmamano a detalye dagiti pasamak.
Innayon ni Tolosa, nasken met a maberipika no adda dagiti saan a malagip ti testigo uray manamnama nga ammona wenno malagipna dagitoy, nangruna no napateg dagiti detalye kadagiti isyu a mapagsasaritaan iti impeachment trial.
Malagip nga kadagiti napalabas a panagdengeg, sumagmamano a testigo ti indatag ti depensa a narigatan a mangsungbat wenno mangilawlawag iti sumagmamano a saludsod manipud kadagiti senador ken dasig ti prosecution.
Gapu iti daytoy, impaganetget ni Tolosa a napateg a timbangen dagiti senator-judges saan laeng a ti linaon ti testimonia no di pay ket ti consistency, kinamapagpiaran ken sapasap a kredibilidad dagiti tetsigo.
Kabayatanna, nakaituding met nga agtuloy ti impeachment trial inton Nobiembre 19, 2026.
