Nabara iti nagbalin nga debate ti nagbaetan ni US President Joe Biden ken sigud a Presidente Donald Trump ti saritaan maipapan ti abortion wenno panangpatinnag iti ubing.
Segun kenni Biden, nakasagana isuna nga isubli ti Roe vs Wade, maysa nga landmark decision idiay Estados Unidos idi pay 1973 a mangit-ited proteksyon kadagiti umili ti estado a mangpili iti abortion.
Ti nadakamat nga desisyon ket na-overturn idi laeng 2022 nu sadino ket tallo kadagiti mahistrado a pimmabor ditoy ket indutok ni Trump.
Kabayatanna, kinondenar met ni Biden iti desisyon ken impaganetget iti kasapulan a maikkan dagiti umili, aglalo kadagiti babbai iti karbengan iti sarili nga desisyon seknan iti nasao nga topiko.
Kinuna met ni Trump nga ad-adu dagiti US citizen iti suportado ti nasao nga desisyon. Saan na met nga ipalubos nga agbalin iti federal abortion ban ngem bay-an na iti tunggal estado nga i-monitor ti kasasaad dagiti babbai.
Kabayatanna, dagiti laeng exceptions a kinuna ni Trump para iti abortion ket dagiti kaso ti rape, incest, ken banag a mangisalakan iti biag ti ina.
Iti agdama ket agduduma iti local laws iti tunggal states ti Estados Unidos mainaig ti abortion.
Sangapulo ken dua (12) ditoy ket mayat iti abortion nu kasapulan daitoy tapno maisalbar ti biag ti masikog;
Sangapulo ken pito (17) nga estado, karaman ti District of Columbia ket addaan kadagiti paglintegan a mangprotektar kadagiti karbengan dagiti babbai nga agpatinnag ti ubing;
Tallo (3) nga estado met iti addaan ti nakadatag iti state constitution-da nga proteksyon para kadagiti agpatinnag ti ubing;
Bayat nga dagiti dadduma pay ket addaan laeng iti limitado nga proteksyon seknan iti abortion, ken nakadatag laeng kadagiti ‘extreme’ cases nu kasapulan a talagan a palubosan iti agpatinnag.
