LA UNION – Dumanon itan ti mapatta-patta a 23,000 nga indibidwal iti intero nga Ilocos Region ti nabakunaan ti 1st dose iti Gamaleya Sputnik V vaccine ken agur-uray pay laeng ita iti pannakabakuna dagitoy para iti 2nd dose.
Iti pannakiuman ti Bombo Radyo La Union kenni DOH Region 1 Medical Officer 4 Dr. Rheuel Bobis, kinunana nga immunan a nagipaulog ti formal communication letter ti manufacturer ti Gamaleya Sputnik V idi June 20, 2021 a maaddaan ti delay ti pannakaideliver iti component 2 ti nadakamat a bakuna.
Awan pay kinuna ni Dr. Bobis ti eksakto a petsa nu kaatnu a makaawat ti alokasyon iti Rehiyon iti component 2 iti Gamaleya Sputnik V vaccine.
Inlawlawag na nga adda ti dua a component ti Sputnik V vaccine a dagitoy ket maaw-awagan ti Component 1 ken Component 2.
Iti component 1 ket nakailatang laeng para iti 1st dose ken saan a mabalin a maitudok para iti 2nd dose iti vaccinee isutgapuna a nasken nga urayen iti component 2 ti nadakamat a bakuna.
No idilig iti dadduma a brand ti bakuna, daytoy ti pakaidumaan iti Sputnik V vaccine, agsipudta dagiti dadduma a brand ket mabalin a pang 2nd dose iti dadduma a nabatbati a suplay iti kapada met laeng a brand, idinto nga iti Sputnik V ket saan a mabalin nga aramaten ti Component 1 para iti 2nd dose.
Adu ita kadagiti nagpabakuna iti 1st dose iti Sputnik V ti agsalsaludsod no adda iti epekto na iti bagi da ti saan a dagus a pannakabakuna dagitoy iti 2nd dose iti naituding a petsa, palawag met iti DOH Region 1 nga awan met ti epekto na daytoy iti bagi da no saan a nasurot ti naituding a petsa ti panagbakuna iti 2nd dose partikular ti Sputnik V.
Innayon pay ti DOH a ti pannakabakuna ti 2nd dose iti Sputnik V ket nasken nga urayen ti 21 days wenno ti gap daytoy sipud idi nangrugi ka a nagpabakuna iti 1st dose ngem gapu iti pannakadelay ti suplay ti Component 2 iti Sputnik V agturong ditoy rehiyon ket binaliwan wenno rinevise ita ti FDA ti panaguray iti pannakabakuna para iti 2nd dose iti nadakamat a bakuna nga itan ket 42 daysen ti urayen.
Kinuna met ni Dr. Bobis nga inton sumangpet ti component 2 ti bakuna nga Sputnik V ket mapakaamwan to met laeng dagiti vaccinees.
