LA UNION – Kinumpirma ti Department of Finance a dumanon iti P100-B iti naka-lugian wenno napukaw iti ekonomiya ti Pilipinas iti tinawen.
Segun iti ahensya, gapu daytoy ti agtultuloy a panag-operate dagiti Philippine Offshore Gaming Operators ditoy pagilian.
Kalpasan ti insayangkat a panagdengngeg ti Senate Committee on Ways and Means , imbaga ni Finance Undersecretary Karlo Adriano a dumanon iti P265.74 billion ti nagbalin nga economic costs ti Pilipinas.
Daytoy ket mas nangat-ngato nu ikumpara iti P166.59 billion nga economic benefit wenno birok ti pagilian manipud kadagiti POGO.
Inlawlawag ni Adriano, a dumanon iti P99.52 billion ti mapukaw a birok ti Pilipinas malaksid pay kadagiti social cost a gapwanan ti POGO-related illegal activities.
Maibilang nga economic cost iti dakes nga epekto ti POGO iti reputasyon ti Pilipinas ken iti panagatras dagiti negosyante gapu daytoy.
Kabayatanna, inrekomenda ti Finance Department a saanen nga ipalubos nga agoperate dagiti POGO ditoy pagilian.
