Agarup ₱31 million iti naitukon a tulong para kadagiti pamilya a naapektaran ti nagsasaruno a dakes a panawen ken napipigsa a panagtudo iti umuna a distrito ti La Union.
Segun kenni Deputy Speaker Paolo Ortega V, agarup ₱3 million agingga ₱5 million iti maawat ti tunggal lokal a gobierno, depende iti kinaado dagiti apektado a pamilya ken kinalawa ti perdision.
Karaman kadagiti naipaay a tulong dagiti food packs ken dadduma pay a dagus a pagkasapulan.
Nagkiddaw met iti opesina ni Ortega ti financial assistance manipud iti Department of Social Welfare and Development (DSWD) para kadagiti apektado a residente.
Naaddaan ti perdision iti agrikultura, dagiti taraken nga ayup ken imprastraktura kalpasan a naglipias dagiti sumagmamano a karayan gapu ti nakaro a panagtudo.
Agtultuloy met nga i-monmonitor dagiti autoridad iti kasasaad ti panawen, kangrunaan iti panagtudo ken panagngato ti danom kadagiti lugar a nalaka a malayos.###
