BR LA UNION – Natay iti agassawa kalpasan a dinungpar ti maysa a pampasahero a bus ti Solid North iti maysa a panganan iti igid ti kalsada a kukua ken pagnanaedan metten dagiti biktima, partikular iti kawatiwatan ti Santa Rosa–Tarlac Road idiay Barangay Sto. Rosario, Santa Rosa, Nueva Ecija agarop ala 1:00 itay parbangon, Agosto 14, 2025.
Dagiti biktima ket nabigbig nga isuda: Edwin Yumol, 50-anyos ken Uzel Reyes, 46-anyos.
Segun kenni Police Major Williard Dulnuan, agdama a police chief ti nasao nga ili, ti bus driver ket maipagarop a kritikal ita ti kondisyon na iti maysa a pagagasan iti nasao a lugar.
Maibasar iti inisyal nga imbestigasyon dagiti otoridad, ti bus ket dumaldalyasat iti kalsada agturong iti daya, idi kellaat a nagpa-kattigid ket dinungpar na iti nakaparada a van ken karinderya.
Nagsardeng laeng ti bus idi naipadeg iti maysa a shop a kaabay ti karinderya.
Awan met ti naipadamag a nasugatan kadagiti pasaheros ti bus.
Agtultuloy iti imbestigasyon ti pulisiya iti nasao nga insidente.
