LA UNION – Nainget a pinaglibakan dagiti aggaama a Flores idiay ili ti Bauang, La Union ti akusasion kadakuada kalpasan a naggigiddan dagitoy a natiliw iti nagsina a barangay gapu iti agtutuon a kaso.
Maipalagip nga agpapada a sumangsango iti kaso nga acts of lasciviousness ken attempted homicide ti ama a ni Rico Flores ken dagiti annakna a da Paul ken maysa a 17-anyos a barito.
Segun iti ama, ti laeng barito nga anakna ti nangaramid iti maipabpabasol a krimen a panangaprusna ken panangmalmalona iti kadendenna ti kabsat ni Rico gapu ta adda daytoy iti trabaho iti nasao a panawen, isu a saanda koma a nairaman a nakasuan.
Iti baet daytoy ket impetteng met ti barito a saanna nga inaprusan ti paset ti bagi ti complainant no di ket nadanogna laeng ti rupana ken nabagsol gapu ta pabpabasolenda a nagubor iti balay.
Immuna iti daytoy, inwaragawag ni PCI Joel Lagto a kanayon nga agiinom dagiti agama agingga a napasamak ti krimen kontra iti nagreklamo a babai.
