BR LA UNION – Posible nga umabot iti 19 agingga 20 a bagyo ti sumrek iti Philippine Area of Responsibility (PAR) iti pakabuklan a tawen, 2025.
Segun kenni Philippine Atmospheric, Geophysical and Astronomical Services Administration (PAGASA) Administrator Nathaniel Servando, posible a saggaysa a bagyo ti sumrek iti bulan ti Enero, Pebrero, ken Marso.
Kalpasan ti summer, namnamaen ti ad-adu a sumrek a bagyo ditoy pagilian, posible a dua agingga tallo a bagyo ti maysa a bulan, kas ti napasamak idi napalabas a tawen.
Immunan nga inruar ti weather bureau iti listaan dagiti 25 a nagan dagiti bagyo ita a tawen, karaman iti 10 nga auxillary name wenno kanayunan a nagan.
Idi 2024, agingga 17 a bagyo ti simrek iti PAR ken innem iti nangibati ti dackel a perdisyon sakbay a nagleppas ti tawen.
Dagitoy dagiti bagyo a napasaran ti pagilian manipud Severe Tropical Storm Kristine agingga Super Typhoon Pepito nga agpapada a napasaran iti naudi a quarter ti 2024.
