BR LA UNION – Kinumpirma ni Budget Secretary Amenah Pangandaman a kabilang kadagiti programa nga impasidong ni President Ferdinand Marcos Jr. iti “conditional implementation” ket iti Ayuda sa Kapos ang Kita Program (AKAP) ken Payapa at Masaganang Pamayanan (PAMANA) Program ti DSWD.
Uray iti Basic Infrastructure Program ti DPWH, Support to Foreign-Assisted Projects, ken panagbayad ti retirement benefits, pensions ken release ti bayad iti retirement benefits ken pensions ti Office of the Ombudsman.
Karaman pay a naipasidong iti “conditional implementation” iti Maintenance and Other Operating Expenses ti nababa a korte ti Hudikatura ken Korte Suprema, panangusar ti sobra a kita manipud iti Total Annual Tariff Revenue ti Rice Importation, Calamity Fund ti National Disaster Risk Reduction Management Program ti NDRRMC.
Karaman pay iti Rewards and Incentives Fund ti Bureau of Customs, ken Availability of Appropriations and Cash Allocations ti Kongreso.
Kinuna ni Pangandaman, kasapolan nga umuna a mangiruar ti guidelines dagiti ahensya kas ti DSWD, DOLE ken NEDA sakbay a maipalospos kadakuada iti pondo.
Daytoy ket tapno masiguro kunana a naurnos iti panangipatungpal dagiti programa ken umno a distribusyon ti kuwarta, nangruna kadagiti programa nga adda pakainaiganna iti panagibunong ti tulong pinansyal.
Kabayatanna, impaayan ti go signal ti Presidente iti sumagmamano a probisyon kas iti panangisimpa ti Organizational Structure ti Kongreso ken bukod da nga Electoral Tribunals ken Commission on Appointments, Special Road Fund ti DPWH, ken Health Facilities Enhancement Program ti DOH.
