BR LA UNION – Sinerrek ken intaray dagiti agtatakaw iti alahas ken kuwarta ti agassawa a senior citizen manipud iti uneg ti pagtaengan dagitoy idiay Brgy. Lomboy, Sto. Tomas, La Union.
Napasamak ti panagtakawan agarop ala 1:30 ti parbangon idi Abril 29, 2025.
Dagiti biktima ket nabigbig nga agassawa a Jaramilio Naca, agtawen ti 70, ken Elena Naca, 62-anyos.
Maibasar iti police report, dagiti suspek kas binigbig ni Mr. Naca ket managan Jay Ramirez, adda ti umno nga edad, kadwa na iti maysa a menor de edad, residente ti Brgy. Namboongan ti nasao nga ili.
Maibasar iti salaysay ti biktima a lalaki, nakapuot ken nakita na iti suspek a simrek iti kuwarto da, nga iggem nan iti bag ti asawa na a naglaun ti mapapati a P20,000.
Karaman pay iti report a mapukpukaw iti 2 a gold necklace agbalor ti 15,000 ken 2 a gold plated a relo, agbalor iti 13,000 pesos.
Maipagarop a kinumprontar ti biktima iti suspek ngem maipagarop a pinang-or na daytoy ti natangken a banag.
Gaputi dayta, timmaray dagiti suspek ken nabati da ti motorsiklo a nagluganan dagitoy, a nadiskubre nga awanan ti plate number.
Saan pay a nalawag nu am-ammo dagiti agassawa a biktima dagiti suspek a simrek iti pagtaengan da babaen iti pannagna da iti tawa.
Iti agdama, agtultuloy ti imbestigasyon dagiti otoridad ken nakasagana metten ti kaso a maidatag kontra kadagiti maipagarop a mangngibrong.
