Simungbat ti sigud a presidential spokesperson a nu Atty. Harry Roque iti isyu a panakibiang na iti kaso ni sigud a Presidente Rodrigo Roa Duterte sadiay International Criminal Court (ICC).
Nagtaud iti isyu kalpasan iti nagbalin nga statement ti legal counsel ni Duterte a ni Atty. Nicholas Kaufman a nakailanad iti maysa a written interview.
Naamwan a maipagarop a trabtrabahoen ni Roque a kasoan iti Dutch government gapo iti panakadetine ti sigud a Presidente idiay The Hague, Netherlands.
Inawagan pay daytoy ti abogado kas maysa a “crazy scheme” agsipudta dagitoy nga addang ket mangpagulo laeng iti kaso ti kliyenteda.
Innayon na pay a nasaysayaat a makikoordinar iti Dutch Government ken saan a kasoan tapno laeng paboran ti korte iti interim release request.
Iti met dasig ni Roque, inlawlawag na a saan isuna a makibib-bibiang iti kaso ni Duterte wenno nangiruar ti waragawag a makaapektar iti legal strategy ti legal team.
Inrason na a kapadana dagiti tagasuporta ti sigud a Presidente, nga iti tarigagay ket makasubli ditoy Pilipinas.
Iti laksid ti nasao nga isyu ket impasigurado ni Roque nga agtaltalinaed iti suportana iti Legal Defense team ni Duterte.#
