Inarestar idi Huwebes dagiti kameng ti Bacnotan Police Station ti maysa manen a gun ban violator idiay Barangay Zaragosa, Bacnotan, La Union.
Binigbig ni Police Colonel Heryl Bruno, Director ti La Union Police Provincial Office (LUPPO) iti suspect a 59-anyos, married, ken residente ti nasao nga barangay.
Naarestar ti suspect kalpasan ti panangiduron ken panangitudo na ti shotgun iti 67-anyos brother-in-law na, kasaruno ti nabara nga argumento gapo ta napabasol isuna a nagtakaw iti native a manok.
Maibasar ti record ti Provincial Investigation and Detective Management Unit ti LUPPO, ti suspect ti maikadua a gun ban violator ditoy La Union – ti immuna ket naarestar kabayatan ti drug buy-bust operation idiay ili ti Aringay idi Enero 13, 2025.
Kabayatanna, maisagsaganan dagiti maiyanatop a reklamo kontra ti suspect partikular ti grave threat ken panaglabsing ti Omnibus Election Code of the Philippines ken ti Comprehensive Firearms and Ammunition Regulation Act.
Agtultuloy met ti panangpalagip ni Police Colonel Heryl Bruno iti publiko a suroten iti nationwide gun ban nga epektibo manipud Enero 12 ken agpaut agingga Hunyo 11, 2025.
Kasaruno daitoy ket inallukoy na pay ti publiko nga ireport dagiti gun ban violators ken dadduma pay a krimen ditoy probinsya ti La Union babaen ti ‘Isumbong Mo Kay Daguit’ hotline: 0968-469-8518, nu kasta ket makaresponde a napartak ti La Union police.
