Dumanonen iti 20 ti bilang dagiti pimmusay gapu iti panagduprak ti Bagyo Kristine idiay Bicol Region.
Maibasar daytoy iti report ni Police Regional Office-5 Director, Police Brigadier General Andre Dizon agingga alas siete ti bigat idi Kalman.
Manipud iti nadakamat a bilang, pito kadagitoy ket taga-Naga City, lima manipud iti Catanduanes, uppat manipud iti Albay, idinto a saggaysa manipud iti Camarines Norte, Camarines Sur, Sorsogon ken Masbate.
Kaaduan kadagiti pimmusay ket gapu iti pannakalmes, idinto a ti maysa idiay Masbate ti napandagan ti natumba kayo.
Nupay kasta, inlawlawag ni Dizon a ti naipadamag a bilang dagiti pimmusay ket maipasidong pay iti validation ti Department of the Interior and Local Government Management of the Dead and Missing.
Malaksid kadagiti pimmusay, uppat pay ti mapukpukaw; dua kadagitoy ket taga-Masbate, idinto a sag-maysa manipud iti Camarines Sur ken Albay.
Ipangpangruna ti pulisya ti agtultuloy a search and rescue operation iti ili ti Ligao, Oas, Libon ken Polangui idiay Albay kasta met iti Nabua idiay Camarines Sur a lagpas-tao iti layos agingga idiay Naga City.
