BALAOAN, LA UNION – Nagpalagip iti Balaoan Municipal Police Station (MPS) tapno maliklikan dagiti aksidente iti kalsada.
Segun iti Balaoan MPS, napateg a suroten ti tunggal drayber dagiti kangrunaan nga pagalagadan iti panagmaneho. Karaman ditoy iti kanayon a panagsuot ti seatbelt, panagtungpal iti naituding nga speed limit, ken panagliklik iti aniaman a klase ti distracted driving kas iti panagusar ti cellphone bayat ti panagmaneho.
Impakita met ti pulisya iti kinapateg ti panagliklik iti panagmaneho no adda iti impluwensia ti arak wenno ilegal a droga. Innaayonda pay, masapul a suroten dagiti traffic signs ken agtalinaed a naalisto ken nakatutok iti dalan iti amin a tiempo.
Mensahe ti Balaoan MPS iti publiko nga iti simple a panagtungpal iti linteg-trapiko ket dakkel a tulong tapno masalakniban ti bukod a bagi, dagiti pasahero, ken dadduma pay a mangusar ti kalsada manipud iti disgrasia. (Report by Bombo Jordan)
