LA UNION – Binallaagan ti anti-tobacco watchdog a BAN Toxics iti publiko kontra kadagiti mailaklako a kiddie bags idiay Divisoria gapu iti kaadda ti lead toxic.
Inaramid ti grupo iti waragawag sumagmamano a lawas sakbay ti panangrugi ti eskuela para kadagiti pampubliko a pagadalan iti maudi a paset ti Hulyo.
Segun iti BAN Toxics, dagiti nasao a produkto nga addaan ti makasabidong a kemikal ket peligro iti salun-at dagiti ubbing.
Impalagip pay ti grupo kadagiti nagannak a kitaenda a naimbag ti product information no adda presensiya ti kemikal.
Babaen ti panangusar iti Analyzer, kinuna ti grupo nga inamirisda dagiti sample ti school bag manipud kadagiti colorful designs , painted fabric , kabilang dagiti zipper ket nakakita da ti makasabidong a lebel ti lead nga umabot agingga 11,900 a parts per million.
Iti nangato a pannakaisarang dagiti ubbing kadagiti kemikal ket mabalin a makadadael iti utek ken central nervous system.
Mabalin a pakaigapuan daytoy ti coma, convulsion, ken pannakatay.
Gapu iti daytoy, inallokoy ti grupo dagiti nagannak a saan laeng a presyo ti rumbeng nga ikonsiderar iti panaggatang ti school supplies para kadagiti ubbing.
