LA UNION – Malamlamayanen idiay ili ti Tubao, La Union ti bangkay ti lider ti Marzan Drug Group a natay kalpasan nga immagaw iti paltog kadagiti pulis idiay ili ti Bacnotan, La Union.
Idi rabii ket nayawiden iti pagtaenganda iti Brgy. Leones West ti bangkay ni Salvador Marzan Sr. a nagsagaba iti tama ti bala iti ulona.
Mainaig iti daytoy, kinuna ni PSI Juan Jay-ar Maggay, hepe ti Tubao Police Station nga agtultuloy pay laeng nga an-anupen dagiti otoridad ti anak ni Marzan a ni Salvador Jr. a naglibas kalpasan a nagpositibo ti naisayankat a search operation iti balayda idi kalman.
Segun kenkuana, nakiumandan kadagiti kabangibang nga ili ken probinsia tapno masapulan iti kabiitan a panawen ti ub-ubing a Marzan.
Maipalagip a ni Marzan Sr. ket maibilang a number 1 high value target drug personality iti entero nga Ilocos region bayat a makadandanon pay idiay Tarlac ti operasion dagitoy, ken sumangsango pay iti kaso a murder.
