LA UNION – Dinupudop dagiti supporters ken kailian ti tabon ti sigud a hepe ti pulisya ken Baguio City Councilor Roberto “Bungo” Ortega iti pannakaitanemna iti Lingsat Public Cemetery itay bigat.
Segun iti kaanakanna a ni Gov. Francisco Emmanuel “Pacoy” Ortega III, kinunana a ni “Markang Bungo” ti idoloda nga agkakasinsin gapu iti napudno ken mapaguadan a panagserbina iti pagilian.
Maipalagip nga iti panagtugawna kas hepe ti pulisya idi 1980s ket naksayan iti 95% ti crime rate iti siudad ti Baguio.
Gapu iti daytoy, napartuat kas pelikula ti kabibiagna a nagakeman daydi aktor a ni Rudy Fernandez kadagiti pabuya a “Markang Bungo:The Bobby Ortega Story” (1991) ken “Iligpit si Bobby Ortega” (1995).
Segun pay kadagiti pulis ditoy La Union, agserbi nga inspirasion kadakuada ti serbisyo ni Ortega nangruna ti panangtungpalna iti rebbenganna uray ania man ti dumteng a tubeng.
Kabayatanna, naipaayan iti 21-gun salute ti sigud nga opisyal ti pulisia kas pammadayaw idi serbisyona.
