LA UNION – Dead-on-arrival iti ospital iti maysa a 52-anyos a misis kalpasan a matinnag iti nagluganan na nga owner type jeep idi malem kalman iti Barangay Baraoas, San Fernando City, La Union.
Iti biktima ket nabigbig iti nagan a Gloria Almojeliana bayat a ti driver ti jeep ket managan Paustino Lazaro, 47-anyos, awanan ti asawa, maysa a negosyante, cabagyan met laeng ti biktima ken agpada a residente ti nasao a barangay.
Maibasar iti report, agdal-dalyasat ti nasao a behikulo iti kalsada idi matinnag ti biktima manipud iti likod ti jeep.
Natay iti biktima kalpasan a nagsagaba iti head trauma injury.
Dagus a naiturong iti punerarya ken nakatuding a maipasidong iti otopsiya.
Kabayatanna, iti driver ket boluntaryo met a dimmatag iti cuerpo ti pulisiya para iti imbestigasyon.
