BR LA UNION – Nasarakan ti bangkay ti mapukpukaw a Transport Network Vehicle Service (TNVS) driver a ni Raymond Cabrera idiay Barangay Batitang, Zaragoza, Nueva Ecija idi Hulyo 11, 2025, segun iti National Bureau of Investigation (NBI).
Ni Cabrera ket naudi a nakita idi Mayo 18, kalpasan a nagilugan ti pasahero asideg iti maysa a casino hotel idiay Parañaque City.
Segun iti NBI, tallo a suspek iti boluntaryo a simmuko kenni Manila Mayor Isko Moreno idi rabii ti Huwebes ken inaklon da nga isud ti akin-aramid ti krimen.
Dua kadagitoy ti nangibaga iti lugar a nangi-bellengan da iti bangkay ti biktima.
Kinumpirma pay ti NBI a natay iti bagsol ti driver, kalpasan a tinakawan dagiti suspek idiay Cavite idi Mayo 18, 2025.
Maibasar iti autopsy report nga inruar ti NBI idi rabii ti Biyernes, Hulyo 11, 2025, dua a bagsol iti barukong ti nakatayan ti biktima.
Maipasidong iti confirmatory tests iti nasarakan a bangkay tapno pormal a mabigbig.
Dagiti suspek nga adda itan iti kustodiya dagiti otoridad ket sumangsango ti maiyannatop a kaso.
