LA UNION – Adda itan iti kustodiya ti pulisya ti maysa a 20-anyos a baro a maipagarup a naalaan iti droga ken paltog idiay Barangay Dulao, ili ti Aringay, La Union.
Nabigbig ti suspek a ni Danilo Mabanta, residente ti nasao a lugar.
Naammuan ti Bombo Radyo manipud iti Aringay Police, maipagarup nga agpapagungga ti nadakamat a suspek idiay barangayda isu a nagipulong dagiti kalugaranna.
Iti panagsukimat dagiti otoridad, naala manipud iti salwad ni Mabanta ti maysa a cal .45 a paltog ken maysa a sachet a naglaon iti maatap a droga.
Isagsaganan ti pulisya ti kaso kontra ti nasao a baro.
