LA UNION – Bimmaba iti 1.62 million ti bilang dagiti awanan panggedan a Pilipino idi Hunyo agdama a tawen maibasar iti kaudian a datos nga inruar ti Philippine Statistics Authority (PSA) idi kalman, Agosto 7.
Iti press briefing, impadamag ti National Statistician ken PSA USec. Claire Dennis Mapa a nababbaba daytoy ngem ti nairekord a 2.11 milyon nga awanan panggedan a Filipino idi Mayo 2024 ken 2.23 milyon idi Hunyo 2023.
Iti bilang ti jobless idi Hunyo ket mangipak-pakita ti 3.1% nga unemployment rate idi Hunyo a nababbaba no idilig iti 4.1% a nairekord idi Mayo ken 4.5% a nairehistro idi Hunyo 2023.
Kabayatanna, simmayaat ti employment rate iti pagilian idi Hunyo, ngimmato iti 96.9%, nangatngato ngem iti 95.9% a nairekord idi Mayo 2024 ken 95.5% idi Hunyo 2023.
Iti bilang dagiti Filipino nga addaan ti trabaho ket 50.28 milyon idi Hunyo 2024. Nangatngato daytoy ngem ti bilang dagiti addaan trabaho idi Mayo 2024 a 48.87 milyon ken 48.84 milyon idi Hunyo 2023.
