BR LA UNION – Rugyan ti Bureau of Customs (BOC) iti maysa a nauneg nga imbestigasyon seknan iti saan a bumaba nga 40 a luxury cars a kukua ti agassawa a Discaya.
Iti agassawa a Discaya ket kontratista nga adda iti sidong ti naduma-duma a proyekto a flood control ti gobyerno.
Plano ti ahensiya nga adalen ken sukimaten dagiti dokumento ken papeles tapno masiguro nu dagiti imported a lugan da Sarah ken Pacifico Discaya ket dimmalan iti umno ken legal a proseso ti panagimport.
Daytoy ket tapno maamwan nu simmurot da iti allagaden ken regulasyon ti gobyerno seknan ti panagiserrek ti lugan ditoy pagilian.
Sakbay iti imbestigasyon, iti koleksyon ti lugan ti agassawa a Discaya ket naitampok iti maysa nga interview, a nangigubway ti naduduma a reaksyon manipud iti publiko.
Ti nasao nga interview iti nangted dalan tapno lalo a matutukan dagiti otoridad iti transaksyon.
Ti agassawa a Discaya iti akinkukua ti Alpha and Omega General Contractor & Development Corporation, a maysa kadagiti 15 a contractor a personal a ninaganan ni President Bongbong Marcos (PBBM).
Iti nasao a kumpanya ket nakagun-od ti nasurok kumurang a 20% iti pakabuklan a bilang dagiti proyekto ti flood control iti intero a pagilian.
Segun kenni Customs Commissioner Ariel Nepomuceno, adda posibilidad a kumpiskaren ti BOC dagiti luxury cars nu mapaneknekan a saan a nabayadan dagiti maiparbeng a custom duties ken buwis.
