Agtultuloy ti panangmonitor ti Philippine Coast Guard (PCG) vessel a BRP Teresa Magbanu iti ilegal a kaadda dagiti barko ti Chinese Coast Guard (CCG) a mangipakpakita iti ‘erratic movements’ iti kabaybayan ti Zambales, agarup 70-80 nautical miles manipud iti takdang.
Iti statement nga inbinglay ti PCG spokesperson for the West Philippine Sea Commodore Jay Tarriela, kinunana nga agtultuloy ti panag-radio challenge dagiti tripulante ti BRP Teresa Magbanua kadagiti barko ti China tapno ipakaammo nga ti operasyon dagitoy iti uneg ti exclusive economic zone ti Pilipinas ket ilegal.
Demonstrasyon daitoy ti panagkumitda a mangsalaknib iti maritime sovereignty ti pagilian a maibasar kadagiti domestic ken international law.
Impasingked dagiti PCG crew a nalawag nga awan ti legal nga autoridad dagiti barko ti China nga agpatrolia iti uneg ti EEZ ti PH ket binilin da a pumanaw a dagus dagitoy iti lugar.
Iti isu met laeng a statement, kinuna ti PCG nga adda ti panagrinnelyebo ti CCG vessels 3103 ken 3304 idi malem ti Huebes.
Panggep ti pannakaideploy dagiti barko ti China a maipasingked ti normalisasion ken kinalehitimo da kadagiti nadakamat a danum.
Iti laksid daytoy, kinuna ti PCG a saanda nga agsardeng iti misionda a manglaban kadagiti kastoy a panagregget ken manglapped iti aniaman a normalisasion ti illegal deployment dagiti barko ti China.
Mainaig iti daytoy, kunana nga babaen ti pannarabay ni Commandant Admiral Ronnie Gavan, agtultuloy ti nainget a panangmonitor ti PCG iti illegal presence ti CCG bayat a maipangpangruna ti national interest ti PH ken malapdan ti escalation.
