LA UNION – Impaganetget ti Bureaun of Immigration a “national concern” iti ngumatngato a bilang dagiti gangannaet nga addaan ti peke a Philippine documents.
Segun kenni Immigration spokesperson Dana Sandoval, nabayagen nga ibagbaga da a national security concern iti nasao nga isyu agsipudta saan laeng a maymaysa iti matiltiliw dagitoy.
Iti napalabas a tawen, nakemmeg da iti aganay 10 a foreign nationals, ken itay laeng nabiit ket tatllo iti natiliw da a gangannaet a nagikot iti bogus a Philippine documents.
Immuna ti daytoy, naipadamag nga umabot ti 200 a peke a birth certificates iti nabisto ti National Bureau of Investigation nga inisyu ti civil registry idiay Sta. Cruz, Davao del Sur, kadagiti Chinese nationals.
Kabayatanna, segun kenni Senator Sherwin Gatchalian, nakaawat daytoy ti impormasyon manipud Chinese community a ti presyo iti panagiproseso ti peke a birth certificates a mapakuyogan ti government ID ket agbalor ti P300,000.
Gaputi dayta, imbaga ni Sandoval, kas bilin ni Immigration Commissioner Norman Tansingco nga iti individual assessment ti amin a travelers a dumalan iti Immigration ket kasapolan a dagitoy mismo ti agsungbat iti travel information.
