Tarigagay ita ti National Council on Disability Affairs (NCDA) nga aramiden a centralize ti disenyo ti Person with Disability Identification Card.
Daitoy ket kalpasan a pinasingkedan ni National Council on Disability Affairs (NCDA) Executive Director Glenda Relova nga adda dagiti magatgatang a PWD ID iti social media.
Kinunana a nasaknap iti kastoy a modus iti Marketplace ket uray maireport ti site, balbaliwan metlang a dagos dagiti sindikato iti website da.
Segun kenni Relova, tapno maliklikan dagiti kastoy a klase ti panangloko ket adda itan ti gakat a nakapila iti Kamara para iti universal design ti PWD identification card nga addaan ti hologram ken microchip tapno saan a nalaka a mapeke.
Kas maiyannurot ti linteg, mabalin a maikkan ti PWD identification card dagiti Persons with Disability ditoy Pilipinas; Maus-usar daitoy tapno makaala kadagiti prebelehiyo manipud kadagiti nagduduma nga establisiyemento.
Karaman kadagitoy ti 20% a discount ti plete kadagiti pangpubliko a lugan, agas ti amin a drug store, ken serbisyong medical.
Mabalin pay a makaala ti educational assistance ken 5% discount kadagiti kangrunaan a pagkasapulan ti maysa a tao a maiyannurot ti Department of Trade and Industry ken Agriculture department.
Impasiguro ti National Council on Disability Affairs ti koordinasyon da iti Persons with Disability Affairs Office nu kasatno ti usto a panag-issue ti ID kadagiti mangayat a mangala.
