BR LA UNION – Inanunsyo ti Department of Social Welfare and Development (DSWD) idi kalman, Domingo a target ti ahensya nga ipatungpal agingga agtapos ti tawen, iti unified ID system wenno napagmaymaysa nga Identifiation card dagiti Persons with Disability (PWD).
Ti nasao nga addang ti departamento ket nairanta a labanan iti agtultuloy nga isyu ti peke nga PWD IDs a maus-usar tapno makaala ti saan nga otorisado a diskwento kadagiti restaurant ken dadduma pay a negosyo.
Itay nabiit ket binabalaw ti Restaurant Owners of the Philippines iti ”nalawa a panagabuso” iti peke a PWD IDs, a nanggubway ti nakaru a pressure kadagiti establisyimento.
Nangisayangkat met dagiti otoridad itay nabiit iti raid iti maysa a bassit nga operasyon idiay Manila a maipagarop a pagar-aramidan kadagiti peke a PWD IDs, nga isuti ibum-bunong dagiti lokal a gobyerno manipud Quezon City, Manila, Pasig, Muntinlupa, ken Angat idiay Bulacan.
Maipalagip nga idi Disyembre 2024, nagballaag ti Bureau of Internal Revenue (BIR) kontra iti panaglakwan ken panagusar kadagiti peke nga PWD IDs, ket segun kenni Senador Sherwin Gatchalian, umabot iti P88.2 billion iti mapukpukaw a buwis ti gobyerno idi 2023 gapu iti panang-peke dagiti PWD IDs.
Iti agdama, agduma ti itsura ti PWD IDs depende iti iyis-isyu dagiti local government unit.
