BR LA UNION – Nainget iti ipat-atungpal ti City Social Welfare and Development Office nga information dessimination kadagiti octogenarian ken nonagenarian a senior citizens ditoy siyudad ti San Fernando, La Union seknan iti paglintegan a R.A. No. 11982 wenno Expanded Centenarians Act.
Iti pannakiuman ti Bombo Radyo La Union kenni Aegan Ral Q. Aquino, agdama a Social Welfare Officer lll, kinuna na ngan agtur-turong da iti naduma-duma a barangay nangruna iti upland areas ti siyudad, tapno ipaka-ammo ken ipalawag kadagiti maseknan a senior citizen ti maipapan ti nasao a linteg.
Aminado ni Aquino nga adu pay dagiti isyu a nasken a mataming ken ipaayan ti pannakasolbar maipapan iti panangiyimplementar ti baro a linteg, ngem kidkiddawen da iti pannaka-awat ken anus iti pamilya wenno cacabagyan dagiti senior citizens, tapno maipaay iti maiparbeng nga insentibo nga iman-mandato ti linteg.
Kinuna na pay, nga uppat agingga innem a bulan sakbay ti milestone age nga 80, 85, 90, 95, ken 100 ket nasken nga agurnongen iti requirements tapno nasapa a maisumite ti listaan iti opisina ti National Commission of Senior Citizens (NCSC).
