BR LA UNION – Sumrek iti audit phase ita a lawas ti impeachment trial kontra kenni Vice President Sara Duterte, kalpasan ti pannakaipresentar idi napan a lawas dagiti nagtestigo iti pannakairuar ken pannakaikkat ti P612.5 million a confidential funds babaen ti Opisina ti Bise Presidente ken ti Department of Education.
Segun kenni House prosecution member Rep. Joel Chua, sumaruno a maisango iti impeachment court dagiti testigo manipud Commission on Audit (COA) tapno ilawlawagda no kasano a na-audit iti confidential funds ken nu maiyannurot iti allagaden ti liquidation ken dagiti naisumite a supporting documents.
Ni sigud a COA State Auditor Roderick Wamil ken agdama nga Intelligence and Confidential Funds Audit Office Supervising Auditor Celine May Del Campo ti manamnama nga umuna nga agtestigo.
Sumaruno kadakuada ni House Legislative Information Resources Management Department Director Marivic Pareja.
Kinuna ni Chua a manipud iti panangtunton iti nagtaudan ken panang-withdraw ti pondo, iyakar ita ti prosekusyon iti isyu nu kasatnu a nagastos ken no umno a na-liquidate dagitoy.
Itay napan a lawas, pinaneknekan ti dua a sigud nga opisyal ti Land Bank a nagtaud iti National Treasury ti P612.5 milyon a confidential fund ken naan-anay a nairuar babaen ti pito a tseke.
Manamnama met a pagsaritaan dagiti testigo iti COA ti direktiba ti komisyon a mangisubli iti P73.287 milion a confidential funds a nairuar iti OVP idi 2022, kasta met dagiti isyu a timpuar iti liquidation documents, pakairamanan dagiti acknowledgment receipts a naglaun ti mapapati a parbo a nagan ken dadduma pay a maipagarop nga irregularidad nga immuna a naibutaktak iti imbestigasyon ti Kamara.
