Binabalaw ti Commission on Audit (COA) ti maipagarop a delayed nga flood control project ti Metropolitan Manila Development Authority (MMDA).
Iti 2023 annual audit report ti COA ken MMDA, nakalanad a 22 manipud ti 58 a proyekto babaen ti Metro Manila Flood Management Project Phase 1 ket natantan ken agingga ita ket saan pay a kumpleto.
Maibasar ti target completion date dagiti nadakamat a proyekto, nalpas kuma dagitoyen idi pay Disyembre 31, 2023; 300 nga aldawen iti pannakatantan na manipud iti target completion.
Ti nasurok 20 a proyekto ket nalatagan ti P510,58M a budget.
Nakalanad pay ti audit report ti COA a 29 a sabali pay nga flood control projects ti MMDA ti saan pay nga maimplementar gapo iti saan a panagsurot ti ‘early procurement activities’.
Dagitoy a 29 a proyekto ket nalatagan met ti P371.029M a budget.
Sumagmamano kadagiti rason a dinakamat ti COA nu apay ta atiddog ti delay ket gapo iti nakapsut nga estratehiya ti MMDA para iti monitoring ken implementasyon kadagiti proyekto ken programa da.
Dagitoy iti rason nu apay a kadawyan a nu saan a makumpleto ket sabalian da manen ti target completion date dagiti proyekto da nga agingga saan ton a malmalpas.
Suhestiyon ti COA, masapul a papartaken ti MMDA ti implementasyon dagiti programa ken proyekto da tapno mapaasayaat ti kaledad ti serbisyo da iti publiko.
