Pinaboran ti Sandiganbayan ti compromise agreement ti baetan ti Presidential Commission on Good Government (PCGG) ken dagiti tagapagmana ti nasinged a gayyem ni sigud a Presidente Ferdinand Marcos Sr. a ti pimmusay a ni Roman Cruz Jr.
Nagserbi ni Cruz kas presidente ken general manager ti Government Service Insurance System (GSIS).
Basar iti resolusyon a napetsaan ti Nobyembre 19, 2024, pinaboran ti Sandiganbayan Second Division ti Joint Omnibus Motion a mismo nga inpila ti PCGG ken dagiti tagapagmana ni Cruz.
Nakalanad iti mosyon a saanen a mangipila ti civil cases ti gobyerno kontra kenni Cruz.
Kasukat iti daytoy ket masapul nga isubli dagiti tagapagmana ni Cruz dagiti sanikua kas dagiti stock shares ken dadduma pay a sanikua ti gobyerno.
Maipalagip a nangipila ti kaso ti PCGG iti anti-graft court idi Hulyo 21, 1987 ken kidkiddawen da iti P276 million a gatad ti kwarta ken sanikua a mapapati a nagun-od ni Cruz ti las-ud ti 20 a tawen a kina-Presidente ni Marcos Sr. ditoy pagilian.
Awan met iti panagkontra dagiti tagapagmana ni Cruz iti nagbalin a desisyon.
