Naka-katkatawa para kenni Manila 2nd District Representative Rolando Valeriano ti pangta ni Bise Presidente Sara Duterte a constitutional crisis no agtultuloy ti panagimbestigar ti pondo ti opisinana.
Segun kenni Valeriano, laosen ti pangta a constitutional crisis a pinulpullo a dekadan a mangmangngegan ngem saan met a mapaspasamak.
Inyunay-unay ni Valeriano, addanto laeng ti constitutional crisis nu mangparnuay ni VP Sara wenno ti kampo na iti gulo a nakarkaro ngem ti gandat a sedition dagiti tattao ti KOJC a nangawag iti panagresign ni Presidente Ferdinand “Bongbong” Marcos Jr., ken pabagsaken ti administrasionna.
Para kenni Valeriano, impakita manen ni VP Sara ti agpayso a kulay na babaen ti panangraut ken panangibaga na a saan nga ammo ti PBBM ti agbalin a presidente.
Nadismaya ni Valeriano ta nakatugaw pay laeng ni Presidente Marcos ket saan pay a 2028 ngem sagsaganaanen ni VP Sara nga agbalin a presidente ditoy pagilian.
