Mangisayangkat ti Department of Agriculture (DA) ti nainget a kampanya kontra iti rice pricing manipulation kalpasan a rimuar ti damag iti mapapati a panag-abuso ti sumagmamano a negosyante ken retailers a mangigubgubuay ti panaggundaway kadagiti konsyumers ditoy Pilipinas.
Segun kenni Agriculture Secretary Francisco Tiu Laurel Jr, addaan dan ti umdas a rason tapno patien nga adda dagiti sumagmamano a negosyante ken retailers nga isadsadya ti panangulaw kadagiti konsyumers babaen ti panangusar kadagiti branded imported rice tapno mapangato ti presyo dagitoy idi nagimbestigar da kadagiti merkado.
Kas paset ti solusyon, imbalakad ni Laurel ti panangikkat kadagiti brand label kadagiti imported rice.
Imbilin nan ti panangikkat kadagiti labels kas iti “premium” ken “special” kadagiti imported rice agsipud ta maus-usar dagitoy tapno mangipangato ti presyo.
Dagiti local rice a maimulmula ket saan a sakop iti daitoy a pammilin tapno maprotektaran dagiti mannalon kasta met dagiti negosyo da.
Segun ti DA, dagiti datos manipud iti rice supply chain ket mangipakpakita ti markup a P6 agingga P8 kada kilo manipud iti landed cost iti imported a bigas ket umdasen tapno adda ti mabirukan.
Kayat na satwen, ti bigas a naangkat manipud Vietnam nga adda pakabuklan a gatad a P40 kada kilo ket saanen a dapat a mailako ti agingga P48 kada kilo.
Binilin payen ti ahensya ti legal division na nga adalen nu mabalin nga ipatungpal ti Consumer Price Act tapno malapdan ti panagabuso ti industriya ti bigas.
Ti sabali pay nga addang ti Presidente ket iti panangkissay ti taripa ti bigas manipud ti 35% agingga 15% idi Hulyo, agtaltalinaed a nangato ti presyo dagiti sumagmamano a brand ti bigas nga isu’t makagapo iti kinaliday dagiti konsyumers ken gobierno.
Innayonn pay ni Laurel a kitkitaenna ti posibilidad ti pannakikoordinar iti Department of Finance (DOF), partikular iti Bureau of Internal Revenue, tapno mangiyuswat ti audit kadagiti financial records dagiti negosyante ti bigas nu kasta ket masiguro a masursurot ti usto a presyohan.
