LA UNION – Pinunas ita ti maysa nga overseas Filipino worker (OFW) iti pagilian a Hongkong ti panagdanag dagiti kailianda ditoy Pilipinas gapu iti idadalapus ti tropical cyclone Merbok.
Immabot ngamin iti agingga signal number 8 wenno kas kapigsa ti signal number 3 ditoy Pilipinas ti nasao a dakes a kasasaad ti panawen idiay Hongkong.
Iti pannakiuman ti Bombo Radyo ken ni Luzviminda Estanilla, kinunana a saanda met a permi nga apektado ti bagyo gapu ta addada iti uneg ti balay ken saan a nagpaut ti panangdupag daytoy.
Segun pay kenkuana, nangitunda iti napigsa nga angin ken tudo ti bagyo ngem gapu iti nasapa a panagsaganada ket natalgedda iti posible a peggad.
Innayonna pay nga idi laeng rabii a naibayog iti nangato a ballaag ti typhoon Merbok ngem signal number 3 laengen iti agdama.
