BR LA UNION – Umaboten ti 24 a tattao dagiti natay iti makaperdi a wildfire idiay Los Angeles, California USA sipud idi Domingo, Enero 12.
Segun iti Los Angeles County coroner wenno medical examiner, walo ti natay iti nalawa a wildfire idiay Pacific Palisades bayat a
16 manipud iti Eaton fire.
Posible a ngumato pay ti nasao a bilang iti tengnga ti agtultuloy a panagsapol ti rescue teams agraman ti cadaver dogs kadagiti lugar nga apektado ti wildfire.
Aganay 16 nga indibidwal ti naipadamag a mapukpukaw.
Mainaig ti daytoy, nangilatag dagiti otoridad ti maysa a center a mabalin a pangi-reportan dagiti mapukpukaw.
Binalakadan met ni LA city Fire Chief Kristin Crowley dagiti residente a saan pay laeng nga agsubli iti nauram a babbalay partikular idiay Palisades area agsipudta adda pay dagiti active fires a mangipaay ti peligro iti lugar para iti publiko.
Awan pay kunana iti suplay ti kuryente ken danum, nadadael iti gas lines ken awan ti stable nga istruktura.
Iti agdama, aganay 150,000 a residente iti LA county ti agtaltalinaed a nakapasidong iti evacuation orders.
