Iyap-apura ti Department of Energy (DOE) ti pannakaleppas ti panagpataray ti 22 a proyekto ti enerhia a manamnama a mangnayon ti agarup a 1,471 megawatt (MW) ti koriente inton Abril 2026.
Segun iti DOE, paset daytoy ti plano a mapapartak ti 200 a power projects iti uneg ti sumaruno a tallo a tawen, kas maibasar iti direktiba ni Presidente Ferdinand Marcos Junior tapno masigurado ti umdas a suplay ti koriente ditoy pagilian.
Kadagiti 22 a proyekto, 12 ti solar nga addaan iti kontribusion a 1,284 MW. Adda pay innem a planta ti hydroelectric, dua a biomass facilities, wind project, ken Integrated Renewable Energy Storage System a makatulong a mangimaton iti suplay.
Impadamag pay ti DOE a 24 a planta ti koriente ti agtartaray, nga addaan iti dagup a kapasidad a nasurok a 1,178 MW. Adda met pito a pasilidad ti Battery Energy Storage System a makatulong a mangpatalinaed iti suplay ti koriente.
Nasinged met ti pannakikoordinar ti DOE kadagiti dadduma nga ahensia tapno masigurado ti madagdagus a pannakaileppas dagiti proyekto, agraman ti panangtarimaan iti transmission, interconnection, ken dadduma pay a teknikal nga isyu tapno maliklikan ti pannakatantan.
Naipaganetget kinapateg ti dagus a pannakaipatungpal dagitoy a proyekto tapno mapennek ti umad-adu a panagkasapulan iti koriente ken masalakniban dagiti konsumidor kontra iti posible a panagngato ti presio ken kinakurang ti suplay, ksaruno paylaeng ti krisis sadiay Middle East.
Kabayatanna, nasurok a 10,000 MW ti renewable energy capacity ti naaprobaran iti sidong ti kaudian a Green Energy Auction Program, a manamnama a mangrugi inton 2026 agingga 2029.
