Inpakaammo ti Department of Health (DOH) a naduktalan da ti baro a kaso ti mpox ditoy Pilipinas, a nangiyeg iti dagup a caseload iti 10.
Naipadamag iti DOH idi Agosto 18, 2024, daytoy ti kaunaan a kaso ti mpox a naduktalan iti pagilian ita a tawen, ti naudi a kaso ket idi Disiembre 2023.
Nangrugi dagiti sintomanas nasurok a makalawas ti napalabas babaen ti gurigor, a sinaruno ti uppat nga aldaw kalpasanna ti pannakatakuat iti naisangsangayan a panagruar ti rashes iti rupa, likud, luppo, gurong, kasta met kadagiti ima ken saka.
Naiturong ti pasiente iti government hospital a nakaalaan dagiti specimen manipud kadagiti sugat ti kudil ken naadal babaen ti real-time polymerase chain reaction (PCR) test.
Kinuna ni Health Secretary Ted Herbosa nga iti agdama ket adda pay laeng iti isolation ti baro a kaso.
Impaganetget ni Herbosa a ti asinoman ket makaala iti mpox babaen ti pannakilangen iti maysa a naimpektaran, babaen kadagiti kontaminado a materiales a kas kadagiti nausar a kawes wenno alikamen, wenno babaen kadagiti naimpektaran nga ayup.
Bayat a saan a kasapulan ti mangikabil kadagiti isolation facilities, impaganetgetna ti pannakasapul iti home isolation para kadagiti indibidual nga addaan kadagiti sintomas wenno positibo iti mpox.
Napateg met ti panagbuggo iti ima, kinuna ni Herbosa, innayonna a saan a kasapulan ti agusar iti face mask.
Dagiti ospital a makaurnong iti kompleto a datos ti kaso ken specimen para iti pannakakumpirma ti mpox ket pakairamanan ti Research Institute for Tropical Medicine, San Lazaro Hospital, East Avenue Medical Center, Jose Reyes Memorial Medical Center, Jose N. Rodriguez Memorial Hospital, Quirino Memorial Medical Center, UP -Philippine General Hospital, ken dadduma pay.
Sigun iti World Health Organization (WHO), dagiti sintomas ti mpox ket pakairamanan ti skin rashes wenno mucosal lesions, gurigor, sakit ti ulo, sakit ti muscle, sakit ti bukot, nababa nga enerhia, ken swollen lymph nodes.
Indeklara ti WHO idi napan a lawas ti mpox a global public health emergency iti maikadua a gundaway iti dua a tawen, kalpasan ti panagraira ti viral infection idiay Democratic Republic of Congo a nagsaknap kadagiti kabangibang a pagilian.
Nangideklara idi Hulio 2022 ti WHO ti mpox a kas maysa public health emergency nga international concern ken naikkat laeng daytoy idi Mayo 2023.
Agdagup iti 38,465 a kaso ti sakit ti naipadamag iti 16 a pagilian ti Africa sipud pay idi Enero 2022, nu sadino iti 1,456 a natay.
Adda 160 a porsiento nga iyaadu ti kaso ita a tawen no idilig iti napalabas a tawen, segun iti datos nga impablaak idi napan a lawas ti health agency.
