BR LA UNION – Naabak ti Filipino boxing legend a ni Nonito Donaire Jr. kontra kenni Riku Masuda iti bantamweight title eliminator idiay Yokohama, Japan.
Simmuko ti kampo ti 43-anyos idi imbellengda ti puraw a tuwalya iti maikawalo a round.
Manipud pay rugi ti laban, nagsasa-gannad a danog ti impalak-am ti ub-ubing a Japanese boxer kenni Donaire.
Apagbiit a nakasubbot ni Donaire iti maikalima a round idi nagdisso ti left hook na, ngem bimmales met ti right hook iti 28-anyos a Japanese boxer.
Idi simrek ti maikanem a round, nakaungar manen ti boksingero a Hapones ket napatumba na pay ti Pinoy boxer.
Maikadua daytoy a nagsasaruno a pannakaabak ni Donaire, ken addaan itan iti rekord a 43 a panangabak, 10 a pannakaabak, ken 28 knockouts bayat a ti Japanese boxer a ni Masuda ket addaan iti 10 a panangabak ken maysa a pannakaabak.
Idi Disyembre, naabak ni Donaire manen kenni Seiya Tsutsumi ti Japan babaen ti split-decision.
