BR LA UNION – Indeklara ti House Committee on Justice idi Miyerkules, Marso 18, 2026 a ‘sufficient in grounds’ wenno umdas ti basaran dagiti dua nga impeachment complaints kontra kenni Vice President Sara Duterte, tapno rugyan ti panagdengngeg iti sumaruno a lawas.
Segun iti komite, saan a direkta a sinungbatan ni VP Sara dagiti alegasyon kontra kenkuana iti ”Answer Ad Cautelam,” nga insumite na kas sungbat kadagiti reklamo.
Ti dua nga impeachment complaints ket naglaun ti akusasyon kontra iti Bise Presidente, a pakaibilangan ti betrayal of public trust, culpable violation of the Constitution, ken dadduma pay, seknan iti maipagarop a biddut a panangusar ti P612.5 million confidential funds ken panangipangta ti biag ni Presidente Ferdinand Marcos Jr. ken pamilya na.
Segun kenni House Deputy Minority Leader Leila de Lima, ti nagbalin a sungbat ti Bise Presidente ket saan a promal a sungbat kadagiti alegasyon.
Kinuna na nga awan ti nagbalin a palawag ni VP Sara seknan iti malversation ti pondo, anomalous disbursements, wenno dagiti envelopes nga inwaras na iti sumagmamano nga opisyal ti Department of Education.
Dismayado met ni Cagayan de Oro 2nd District Rep. Rofus Rodriguez iti nagbalin a sungbat ni VP Sara Duterte kadagiti naidatag a reklamo kenkuana.
Inaprubaran ti House of Representatives iti resolusyon tapno rugyan ti komite iti impeachment hearing proper, tapno talantanen ken amirisen dagiti ebidensya ken testimonya ti agpada a reklamo kenni VP Sara.
Mangrugi ti pormal a panagdengngeg inton Marso 25, 2026 uray naka-recess ti Kamara.
