BR LA UNION – Nakasaganan ti La Union Police Provincial Office a mangipatungpal iti enhanced security para iti masungad a Holy Week 2026 iti intero a probinsiya.
Indaulwan ni PCol. Redentor C. Ulsano, Provincial Director iti La Union Police Provincial Office (LUPPO), iti command conference a dinar-ayan amin a Chief of Police ditoy probinsiya, tapno i-presintar kenkuana iti bukodda a deployment plans.
Maysa daytoy a wagas tapno masigurado ti umno a pannakai-deploy dagiti kameng ti pulisiya kadagiti kangrunaan a lugar, nangruna iti simbaan, transport terminal, kangrunaan a kalsada, ken pagpasyaran dagiti adu a turista.
Napateg ti police visibility operations kadagiti natao a lugar tapno malapdan ti krimen ken mataginayon ti urnos ken kinatalged ti publiko.
Iti biang ti La Union PPO, nakasaganan iti operational team, a pakairaman ti 27 personnels para iti standby team, 14 para iti baywatch operations nga agbantay iti igid ti baybay, 14 para iti quick response team a mangsungbat kadagiti insidente, ken 14 para iti search and rescue operations nga alerto no adda didigra.
Nakasagana metten dagiti personnel manipud Regional Office, La Union Police Mobile Force Company (PMFC), ken dadduma pay a support units ti Philippine National Police a mangipaay ti augmentation ken mangpullat nu adda panagkurang dagiti personnel iti sumagmamano nga estasyon ti pulisiya, nangruna kadagiti lugar a manamnama a pagturongan ti adu a turista.
Agtultuloy met a maipatungpal ti checkpoint operations kadagiti kangrunaan a kalsada ken national highway kas paset ti crime prevention ken road safety measures.
Maipasdek dagiti police assistance desk babaen ti programa a “Lakbay Alalay” a tumulong ken mangiwanwan kadagiti biyahero.
Makikoordinar pay ti PNP iti dadduma nga ahensiya ti gobierno kas iti MDRRMO, Philippine Coast Guard, Bureau of Fire Protection, Bureau of Jail Management and Penology, Department of Public Works and Highways, ken lokal a gobierno tapno masigurado ti umno a koordinasyon no panawen ti emerhensiya.
