BR LA UNION – Nakatuding a kaswan ti GV Florida Transport, Inc. iti uploader ti video a mangipak-pakita ti panagli-linnumba ti sumagmamano a Florida bus, a maipagarop a maysa a kita ti reckless ‘racing’ iti national highway.
Segun kenni Atty. Alexander Versoza, legal counsel ti GV Florida Transport, Inc., mangaramid ti kompanya iti legal proceedings kontra kenni Carlo Carbonel—ti maipagarop nga uploader ti video.
Kaso a cyberlibel iti posible a sangwen ti uploader, gaputi panangipakita na iti sumagmamano a florida bus nga agli-linnumba iti kalsada, banag a pinaglibakan ni Atty. Versoza, agsipudta in-fast forward ti uploader dagiti video clips, tapno pagparangen nga aglilinnumba dagiti nasao a bus.
Maipagarop a napasamak daytoy iti national road idiay Cagayan idi Hunyo 8, agdama a tawen.
Nangitunda daytoy iti pannaka-revoke iti lisensiya dagiti tallo a driver ti florida bus ken 30-day suspension kadagiti 15 units, partikular dagiti addaan ti ruta a Sta. Ana to Sampaloc idiay Cagayan ken Baguio City to Apayao.
Inakusaran pay ti nasao a bus company iti video ni Carbonel nga addaan ti ‘malicious’ intent.
Impaganetget ti bus company a committed para ti kinatalged dagiti pasahero, ngem dagiti kastoy kunada a klase ti misleading video iti mangisagmak kadakuada.
Kabayatanna, pinasingkedan manen ti Department of Transportation (DOTr) iti kari da a protektaran dagiti indibiduwal nga ag-report iti opisina seknan iti panagabuso iti transportation sector.
Daytoy ket personal nga imbaga ni Transportation Secretary Vince Dizon iti uploader iti racing bus video.
