BR LA UNION – Inarestar dagiti otoridad ti maysa a karpintero kalpasan ti maipagarop a panang-bagsol na iti maysa a foreman idiay Barangay Disso-or, Bauang, La Union idi malem ti Miyerkoles.
Binigbig ni Police Col. Heryl L. Bruno, Director ti La Union Police Provincial Office, iti suspek kas 47-anyos, tubo ti Barangay Turko, Laoac, Pangasinan bayat a ti biktima ket 57-anyos, foreman, tubo ti Purok 1, Lauc Lourdes, Pampanga.
Maibasar iti report ti pulisiya, sakbay ti insidente ket naginom ti nasanger dagiti dua iti ruar ti barracks dagitoy agarop alas 10:00 ti bigat, kalpasanna simrek dagitoy iti bukodda a kuwarto.
Iti oras ti alas 3:00 ti malem, ti suspek a maipagarop nga armado ti kutsilyo ket simrek iti kuwarto ti biktima ket dagus na a binagsol daytoy ti namin-adu a daras.
Iti makit-kita a motibo dagiti otoridad ket iti maipagarop a panangbasa ti danum ti biktima bayat a mat-maturog iti suspek.
Ginandat ti suspek nga aglibas ngem naarestar babaen kadagiti kameng ti 2nd Provincial Mobile Force Company ti LUPPO.
Nagsagaba ti biktima ti pannakabagsol iti bibig ken tengnged ken dagus a naiturong iti Ilocos Training and Regional Medical Center tapno maagasan.
Ti suspek ket nakaditine iti Bauang custodial facility ken maisag-sagana ti maidatag a kaso a frustrated murder.
